De iugement. ⸿ ix

Jugement est sentence donnee par les iuges de choses que les parties proposent et responnent en cort.

⸿ Les iuges sunt sages persones et autentiques qui en cort font iugement de ce que il oent si comme sunt les arceuesques les enuesques et les chanoines des yglises cathedrax. et les autres persones qui ont dignete es yglises. les abes. les priors conuentuaus et les gouuerneors des yglises qui sunt creables par lor sens et par lor honeste. et les baillis et les cheualiers et les serians de l espee. et les seneschaux as barons qui sunt creables par lor discretion et par lor honeste. ⸿ Nul de cels que nos auon nomme ne doit estre oste de iugement se la querele n est soe propre ou se il nia partie ou se il ne la menee en cort. ou se il n a este atorne ou se il n en a donne conseil ou tesmognage en cort.

⸿ Le iustisier doit dire as iugeors en audience les choses de quoi iugement doit estre fet par celes meismes paroles que les parties auerses ont proposees et respondues sans riens metre ne oster ne changier par quoi le iugement doie estre mue. Se aucune partie des iugeors dit que il n a pas la chose recordee a droit les paroles doiuent estre retraites par le recort de la cort.

⸿ Se les iugeors ont este presens a oir la cause et il ont oi diligeaument les paroles de quoi le iugement doit estre fet. il n est pas mestier que eles soient plus recordees. ains en doiuent fere tantost le iugement. mes le baillif lor doit auant enioindre sor la foi et sus le serement que il doiuent garder au duc de Normendie que il facent leal iugement de ce que il ont oi selon lor entention et selon la costume du pais. ce que il iugeront par commun assens soit garde.

⸿ Se il se discordent en fere le iugement. ce que la gregnor partie et la plus sage iugera soit garde. et se les plus sages et les gregnors sunt meins que les autres. le iugement soit delaie iusqu au autres assises. ou a l eschequier se mestier en est. si que il soit esclairie par la sentence de plusors. M es les cas en doiuent estres ostes en quoi la demore poet engendrer peril et donner la chose a aucun autre. si comme il auient es contens qui sunt meus de presentement des yglises. quer se le contens endure plus de vi mois li enuesque en qui enuesquie liglise est la porra donner a qui que il uoudra.

⸿ Et por ce le sage iustisier doit faire garder ce qui aura este iugie par la greignor partie des iugeors et par les plus sages qui ne soient pas soupechonous.

⸿ Nul ne doit riens dire en iugement contre la uolente de sa conscience.

⸿ Nul ne doit estre flechi de droit ne par amor ne par grace ne par haine que il ne die ce a quoi sentention s acordera que il ne soit tenu por mauues.

⸿ Se le iustisier saperchoit que les iugeors desuoient en fere iugement ou par ignorance ou par malice ia soit ce que touz se consentent a un. il doit delaier iusques as autres assises es queles il se doit tenir a la sentence du plus sain conseil ou du plus discret. iasoit ce que le iugement a cels qui sunt soupechonous ou par amor ou par grace ou par haine soit oi

Ne por quant. neporquant il ne doit pas estre receu por la sopechon. Quant le iustisier uelt delaier le iugement en quoi touz ceus s acordent que sunt en la cort il doit mostrer raison par quoi lor sentence doit estre cassee.

⸿ Les barons doiuent estre iugiez par lor pers. et les autres par touz ceus que l en ne puet oster de iugement.