De ueof homme.Cxvij

A utresi doivent estre rapeles les fieux qui ont este encombres el tens que les hommes les tenoient por lor veovete.

⸿ Costume est en Normendie de pi cea que se i homme a eu femme de qui ele ait eu enfant vif ia soit ce que il ne vive mes. toute la terre que il tenoit de par la femme el tens que ele morut remaindra a lui tant comme il se tendra de marier. quant il se ra mort ou quant il sera marie. la terre que il tenoit par la reson de sa femme revendra as eirs a la femme a qui ele doit eschaier de sa mort. et se il l encombra el tens de sa veovete enqueste en soit fete en la maniere que nos deismes devant. et se l en neeque il n out onques enfant vif de sa femme. il sera enquis par l agent du visne. ou il dit que lenfant fu ne de quoi l en croie par aucune reson la verite que il ne soient soupechonnos par quoi il doient estre ostes de l enqueste. se l en dit que cele qui fu morte ne fu pas sa femme. enqueste en soit fete savoir mon se il l out a femme par le consentement de sainte yglise el tens que ele morut. et se il est mis en nonsavoir il remaindra sans le fieu que il voloit tenir par sa veovete se il ne prove que cele qui est morte fu sa femme. et se il l offre a prover dedens l an et le ior il tendra la terre a la femme par la reson de sa veovete. ⸿ Ce doit estre garde d enqueste et de prove de mariage. se l en noie le mariage.