98. — Le procureur de la court dit vers Richart Bourdel : « Vous estes tenant de plusieurs et beaux heritaiges de messeigneurs les religieux de Saint Oen de Rouen, a cause et pour raison desquieux vous leurs devez plusieurs rentes, faisances et redevances ; et, pour ce que ne les avez paiés au terme et en la manière qu'ils sont deubs et qu'ils ont esté acoustumé paier, et aussi pour amendes de court, pour amende de rente sourtenue, pour escroe non baillée, pour reliefs, pour xiij mes, pour abus, attemptas et autres devoirs de fief et pour chacune d'icelles causes a suffisance, votre fief fut [prins] en la main de mondit seigneur par trois dimences continués et le quart d'abondant, a oye de parroisse, et les prinses rapportés en ces plès, ainssi qu'il appartient a faire selon raison et coustume ; et vint ledit cry ou peut venir a votre congnoissance, qui fut fait ainssi nottoirement comme j'ay dit. Et, ce nonobstant, de votre auctorité, sans congé avoir de mesdits seigneurs ou d'autres ayans povair ad ce, et sans avoir de ce fait delivrance coustumière, en attemptant contre et eu prejudice d'icelles prinses, vous avez mis la main a iceulx heritaiges ou fait mettre, labouré, cueilli et levé les levés et revenue d'iceulx heritaiges qui, a cause desdits, prins estoient et devoient apartenir a mesdits seigneurs et que je estime valloir x l. to. le regart de bonnes gens ; et ces choses et chacun d'icelles avez congnu et confessé et promis adrecher et amender, et restituer icelles levés et revenus au pris et estimacion dessusdits. Et pour ce dit et conclu contre vous : Mon propos congnu, vous avez attempté et mesprins et en devez faire adrecher amende, et les dictes levés rendre et restituer par moy par moy (sic)desclairés, ou ce qu'il sera ceu qu'ils valloient ou povaient valloir a l'estimacion de bonnes gens ; et, s'aucune chose en est denyé ou mise en doubte, l'obbeys a prouver, veriffier et ensaigner tant de fait que de confession, comme je devroy et au cas appartient selon raison et la coustume du païx. »