La Gazette de Renaudot

De Londres, le 11 Octobre 1685.

Mylord Jeffreys Chef de Justice de la Cour du Banc du Roy a tenu les Assises à Exeter, Vingt six rebelles qui estoient dans les prisons y ont esté condamnez à mort : & quatorze ont esté exécutez. Il les a ensüite tenues à Taunton: & quatre cents cinquante rebelles y ont esté condamnez : mais il n'y en aura que trente exécutez. Les Juges se sont depuis rendus à Wels, où il y avoit plus de neuf cents prisonniers: & delà ils sont passez à Bristol & en d'autres endroits du Comté de Sommerset. Douze cent rebelles ont esté condamnez à mort: deux cents cinquante seront exécutez, & les autres seront transportez dans les Colonies Angloises d'Amérique. Mylord Jeffreys est allé ensüite à Windsor , Le Roy en considération des grands services qu'il a rendus à l'Estat sous le régne du feu Roy , & depuis l'avénement de Sa Majesté à la Couronne, l'a créé Chancelier du Royaume, & luy a en mesme temps remis le Grand Seau entre les mains. Sa Majesté n'a pas encore nommé celuy qui doit luy succéder dans la charge de Chef de Justice de la Cour du Banc Royal. Le Duc d'Albemarle qui avoit esté quelque temps sans venir à la Cour, a salüé le Roy à Windso r : & il a esté tres bien reçeu. On croid que Sa Majesté reviendra icy de Windsor , le 16 de ce mois. On n'a eu encore aucunes nouvelles de Mylord Maklesfield : & on croid qu'il est sorti du Royaume.