Scripta n° 1316

Numéro Scripta	1316

Auteur(s)	Caen (bailli)
Bénéficiaire(s)	Bayeux (chapitre cathédral)

Genre d'acte	charte
Authenticité	non suspect
Datation	1285, 13 novembre
Lieu d'émission	Caen
Action juridique	autre
Langue du texte	ancien français

Analyse

Accord intervenu entre le chapitre de Bayeux et Michel de Courtonne, sieur de Lasson, au sujet de la tierce gerbe de la dîme de Lasson.

Tableau de la tradition

Éditions principales

a. Bourrienne Valentin (Abbé), Antiquus cartularius ecclesiæ Baiocensis (Livre noir), Rouen-Paris, Lestringant-Picard (Société de l’histoire de Normandie), 1902-1903, 2 vol., n° DXLIII, t. 2, p. 293-294..

Texte établi d’après a

A touz cels qui verront ces présentes letres, le ballif de Caen, saluz en nostre Seignor. Saechent tuit que, comme contenz fust meu entre hennorables hommes le déein et le chapitre de Baiex, d’une part, et Michiel de Cortonne, sire de Lachon, de l’autre, sus la tierche gerbe de Lachon, à qui la tierche gerbe de droit apartenoit et devoit apartenir, ou au déein ou au chapitre de Baiex de sus diz, ou au devant dit Michiel de Cortonne, et les devant dites parties sus cest contenz se fussent mises, haut et bas, en dit et en l’ordenance de ennorable homme mestre Robert de Bentecort, déein de Baiex, à fere sa volenté du tout en tout du contenz devant dit, et eussent pramis iceles parties que il tendroient et garderoient le dit et l’ordenance du dit déein que il prononceroit sus le dit contenz, haut et bas, segont sa volente: à la parfin, en l’assise de Caen, qui fu l’an mil ijc quatre vinz et chinq, el mois de novembre, le mardi après la feste saint Martin d’yver, présenz le dit Michiel de Cortonne por soi, d’une part, et monsour Sohier Vincent, prestre, rector de l’iglise de Listée, procurator establi du chapitre devant dit por icels comme procureor de l’autre, le dit mestre Robert de Bertencort, déein de Baiex, oiés et veues dilaugement les resons d’une partie et d’autre, et ou conseil de bones genz et de saeges genz, si comme il disoit, son dit et l’ordenance, dist et prononça par devant nous sur le contenz de sus dit en ceste manière : c’est assaveir, que la tierce gerbe de la diesme de Lachon est du chapitre de Baiex, et apartient au dit chapitre de droit, tant par letres que par la longue sésine d’eus et de lors prédécessors, et de cels de qui il ont cause, et que le devant dit Michiel de Cortonne n’a en cele nul droit, ne ne puet en icelle nul droit réclamer ; et dist, par son dit, que il restablisse au dit chapitre de Baiex huit gerbes que il prist de la dite tierce gerbe, et, en signe de cen, que il despoilla le dit chapitre des huit gerbes à tort, que il ressesisse des huit gerbes le dit chapitre et les leus où eles furent prises, dedens la première assise de Caen procheine à venir. En tesmoig de la queile chose, nos avon mis le seel de la ballie de Caaen à cestes présentes letres, sauve la dreiture le Rei. Ce fu donné l’an de grâce, en l’assise et el jor devant diz.

Pour citer l'acte :

« Acte 1316 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_1316.html [consulté le 24/11/2024].

Création de la fiche

2006-05-18

Dernière mise à jour

2023-12, EMancel