Scripta n° 2197

Numéro Scripta	2197

Auteur(s)	Jean Caperon, garde de sceau de la vicomté de Caen [autre]
Bénéficiaire(s)	Jean Marmion [autre]

Genre d'acte	charte
Authenticité	non suspect
Datation	1294, 15 octobre
Action juridique	autre
Langue du texte	ancien français

Analyse

Accord entre Jean Marmion et Richard et Michel ditAs Castris au sujet du fief d’Anéeles (ou Néeles).

Tableau de la tradition

Éditions principales

a. Saige Gustave, Cartulaire de la seigneurie de Fontenay le Marmion, Monaco, Imprimerie de Monaco, 1895, n° CXV, p. 155-156..

Texte établi d’après a

A touz ceuls qui ces lettres verront, Jehan Caperon, garde du seel de la visconté de Caen en main de Roi, salut. Sachiez que le mardi, jour de feste saint Pierre as lians, veisme et diligeanment regardasmes unes lettres seelées du seel de la visconté de Caen donc len usoit pour le temps, saines et entieres, sanz vice et sanz corruption, contenantes la forme qui ensuit : — A touz ceuls qui ces lettres verront ou orront, le visconte de Caen, saluz. Comme contens fut meu entre Jehan Marmion, dune part, et Richart et Michiel diz as Castris, freres, dautre part, sur ce que le dit Jehan demandoit as diz freres et vouloit avoir par plusours raesons, moultes et proieres de charue, et les en avoit fet justicier et molester en sa court, les diz freres proposanz et affermanz le contre par plusours raisons ; en la parfin les parties sacorderent en la maniere que apres ensuit : Sachiez tous que par devant nous, visconte dessus dit, fut presens en sa persone le dit Jehan, et recognut que il vouloit et otroit que les diz freres et lour hers tiengent et prinsient des ore en avant, bien et empés, touz les fiex, les tenemenz que il tienent de luy en quel lieu que il soient, a camp et a ville, franchement et quitement de toutes choses qui au dit Jehan pourroient avenir et a ses hers. Et vout et otria ensement le dit Jehan que les diz freres et lour hers puissent achater et escroistre els toutes les fiées que il pourroient en son fieu de Neeles, et poursient toutes les acquisitions et touz les achaz que il pourront fere et toutes les eschanches que a els et a lour hers pourroient venir par quel raison que ce fust ou peust estre en dit fieu de Neelez, tant soulement, sanz nulle reclamance, sanz nule seignourie et sanz nule justice desorenavant du dit Jehan, ne de ses heirs, ne dautre qui peust aver cause dels, et sanz ce que il puissent desorenavant traitier en lour court, fors tant soulement pour les trois aides coustumieres, quant ils chaerront, et pour treziesmes, et pour forfetoure, et pour reliés, les quielx choses pourroent au dit Jehan et a ses hers avenir de droit. Et est assavoir que le dit Jehan et ses hers sont et seront tenus la dite pez et le dit acort tenir et fermement garder, en boene foy, sanz aler en contre. Et pour ce, les diz freres en ont donné et paié au dit Jehan XII livres et diz soulz de torneis, donc il se tint pour bien paié par devant nous. Et quant a cen dessus dit tenir et enterignier sanz aler en contre as diz freres, ou a lour commandement, portant ces lettres, le dit Jehan, pour luy et pour ses hers, obligia par devant nous son cors a tenir prison et touz ses biens moebles et heritages, ou que il soient, presenz et a venir, a prendre, a lever et a vendre par la justice le Roi, jusques atant que la pez et acort dessus dit soient enterigniez as diz freres, et les couz et les damages renduz et restorez que il aroient pour deffaut denterignier lacort et la pez dessus diz. Et renoncha expressement le dit Jehan a touz privileges de croiz prinse et a prendre et a toutes exceptions de fet, de droit par quoy cen que dessus est pourroit estre empeeschié. Et en tesmoing de cen, nous avon seelé ceste lettre du seel de la visconté de Caen, sauve la droiture le Roy et autri. — Cen fut fet en lan de grace mil CC IIIIxx et quatorze, le vendredy apres la feste saint Denis.

Pour citer l'acte :

« Acte 2197 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_2197.html [consulté le 21/11/2024].

Création de la fiche

2007-04-26

Dernière mise à jour

2023-12, EMancel