Scripta n° 8480

Numéro Scripta	8480

Bénéficiaire(s)	Aunay-sur-Odon, Notre-Dame d’Aunay (abbaye)

Genre d'acte	notice
Authenticité	non suspect
Datation	...1300...
Action juridique	autre
Langue du texte	ancien français

Analyse

Exposé des motifs de l’exemption de tiers et danger.

Tableau de la tradition

Éditions principales

a. Le Hardy Gaston, Étude sur la baronnie et l’abbaye d’Aunay-sur-Odon, Caen, H. Delesques, 1897, Pièces, n° 23, p. 299-301..

Texte d’après a

Vez ci les resons par quoi l’abé et le colvent d’Auney en Normendie de l’ordre de Cisteaux dient que eus poent et doivent vendre les bois sans tiers et sans dangier. C’est assaveir le bosc Aalouf qui est à la Ferriere deu Val. E lor bois d’Auney. Toues ces bois sunt de la connestablie de Normendie si quie tout le païs le set bien. Laquele connestablie Henri rey d’Engleterre e duc de Normendie donna premièrement a Richard deu Hommeth e le conferma après à Willame deu Hommeth son fiz. E après ten, Richard ensenment rey d’Engleterre e duc de Normandie, fiz au dit Henri, confirma au dit Guillaume du Hommeth la dite connestablie. Tant par uns moz e parpoint de lettres que les diz connestables tensissent toute la dite connestablie bien e en pes, franchement e quitement, entièrement, plenièrement e honourablement, en bois, en plain e en tous autres leus, o toutes lours franchises e lour franches coustumes, si que vous pourez voier es chartres dont l’en vous monsteura les transcriz. E par la vertu de cez lettres, trestous ceus qui unt bois en la dite conestablie ont touz jours usé et usent unquore touz les jours de vendre les, sanz tierz et sanz dangier e n’en sunt de rien repris ne ne doivent estre par le point de lour lettres. E les diz Conestables qui fundèrent la dite abeie dauney donnèrent à la dite abeie et as moines qui i servent Deu, les bois de sus diz de la Feriere et d’Auney en pure et pardurable aumosne autressi franchemen e quitement comme eus les avoient e porsoient, e par ceste raison les diz abé et colvent qui unt autressi comme heirs a connestables quant à ceu autressi comme les connestables unt usé de vendre tous bois sans tierz sanz dangier, quar eus sunt de une meismes franchise e digneté. E se merveillent les diz abés e couvent que n’en les en reprent plus que les diz connestables, comme eus soient d’une condition quant à ceu. E semble bien que ce fu par hainage que maître Laurenz Heraut avoit a eus. Plus dient les diz abbé e colvent que par desus la droiture de sus dite que eus unt es ditz bois, le devant dit Roy Henry d’Engleterre e duc de Normendie lor conferma les diz bois que le dit Ric. deu Hommeth lour aveit donné, e especefie le dit Roy et duc, e meth expressêment et nommément le bois d’Auney et le bosc Aalouf, e le conferme a la dite abeie d’Auney en pure en franche e pardurable aumosne, bien e en pès, franchement e quitempent, entièrement, plenièrement e eunorablement, e o toutes les franchises e les franches coustumes. E par ces resons desus dites, il est avis a diz abbé e coluent que nen lor fet grief quant les connestables qui n’ont que une confirmation pour eus, e les moines en unt deus, une a eus e as connestables général, é une autre à eus tant soulement espetial. Si requerront que n’en les en lesse a pès. Si comme n’on fet les connestables, quar nen le droit fere par plus forte raison. E si dient les diz moines que au tens que le dit Roy d’Engleterre lor conferma les diz bois neu ne paiont ne tierz ne dangier en Normandie, por quoi il ne fu nul mestier que il en feist mencion en sa confirmation. E si dient que se tierz e dangier en estoient paiez, les bois qui tous lour furent données en pure e pardurable aumosne à tenir franchement et quitement e honorablement, o toutes ses franchises e ses franches costumes, eus n’aroient de lor boiz fors petit plus que la moitié. E si ne seroit pas la volenté des donnoors ne del confermoors gardée ne acomplie. E grace de prince ne doit pas estre apetichie, mes eslargie, ou estre tenue en son bon estat.

Pour citer l'acte :

« Acte 8480 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_8480.html [consulté le 22/12/2024].

Création de la fiche

2014-03-24

Dernière mise à jour

2023-12, EMancel