Scripta n° 794

Numéro Scripta	794

Auteur(s)	Raymond Passemer, Eu (bailli)
Bénéficiaire(s)	Le Tréport, Saint-Michel (abbaye)

Genre d'acte	charte
Authenticité	non suspect
Datation	1292, 29 novembre
Action juridique	règlement conflit
Langue du texte	ancien français

Analyse

Accord passé entre les moines du Tréport et Guillaume de Cantepie, écuyer, au sujet du droit de justice à Lignemare

Tableau de la tradition

Éditions principales

a. Laffleur de Kermaingant Pierre, Cartulaire de l’abbaye de Saint-Michel du Tréport (ordre de Saint-Benoît), Paris, Didot, 1880, n° CCXXXVII, p. 268-270..

Texte établi d’après a

A tous cheus qui ches lettres verront ou orront Raimmont Passemer, ballif de Eu, salut. Conme contens fust meu entre honmes religieus l’abbé e le convent du Troiport, d’une part, e Wyllaume de Cantepie, escuier, d’autre, sus che que le dit Wyllaume avoit fet justise e pris nans en un fié que les dis religieus ont en une ville que l’en apele Mellemare, e les dis religieus eussent mis gage e plege que le dit Wyllaume avoit fet justise ou il ne pooit ne ne devoit ; e pour che que les dis religieus ne voleient mie contenchier ne plesdier au dit Wyllaume, par concel de bone gent, il s’acorderent e le dit Wyllaume autresi que monsegneur Henri de Grantcort e mesire Wyllaume de Pierrepont, chevaliers, seussent e enquersissent combien les aides costumieres e les corvées de chu fié porroient valoir a pris d’argent, e che que il diroient que il devroient valoir, le dit abbé e convent rendroient au dit Wyllaume, a achater rente en son fié ou la il vodroit, ou a fere sa volenté de l’argent, ja soi che que il ne conoissoient que le dit Wyllaume eust en chu fié ne justise ne segnourie ; e comme contens fust entre eus, en la cort de anorable homme e discrest l’official de Roam, meu par la raison de chele justise, les desus nommés abbé e convent e le dit Wyllaume se mistrent du tout es deus chevaliers desus nommés, mesire Henri de Grantcort e mesire Wyllaume de Pierrepont desus nommés, a fere leur volenté, e se obligerent a tenir fermement, sans aler de riens encontre, tout che que les deus chevaliers desus dis diroient ou ordeneroient des contens e des debas desus dis ; en tele maniere que se il n’estoient a acort, que mesire Robert de Saint Pierre, chevalier, eleu e nommé des parties desus dites, seroit le tiers, e a che ou il s’acorderoit ovec un des autres seroit tenu fermement, sans che que nule des parties en peust aler de riens encontre : nous faisons assavoir que les parties presentes par devant nous, que le dit monsegneur Henri e le dit monsegneur Robert, qui apelé estoit le tiers miseeur, pour le debat qui estoit entre le dit monsegneur Wyllaume e monsegneur Henri, rendirent leur dit en le maniere que il en sieut, ch’est assavoir que le dit abbé e convent rendroient au dit Wyllaume vint e une livre, sept souz e sis deniers tornois pour toutes choses, e que, des ore en avant, le dit Wyllaume ne ses hoirs n’aroient justise ne segnourie sus le devant dit fié, pour nule chose quele que ele fust ; e, des despens fès en la cort de l’official, que nul ne seroit tenu a rendre riens a l’autre, e qui plus aroit mis, si s’en soffrist. E chest acort fu aporté par devant monsegneur le conte e devant son conceil, u jour du samedi en le vegille saint Andrieu l’apostre, qui fu en l’an de grace mil CC. e IIIIxx. e douze, e, par le conceil que monsegneur le conte en eut, il quemanda que nous feissons as devant dis abbé e convent lettres seron chest acort. E u tesmoing de che e en ensivant le quemandement monsegneur le conte, avons ballié au dit abbé et convent ches lettres seellées du seel de le ballie du conte de Eu. Fetes en l’an e u jour desus dis.

Pour citer l'acte :

« Acte 794 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_794.html [consulté le 09/05/2024].

Création de la fiche

2006-05-15

Dernière mise à jour

2023-12, EMancel