Scripta n° 2514

Numéro Scripta	2514

Auteur(s)	Coutances (vicomte)
Bénéficiaire(s)	Coutances (hôtel-Dieu)

Genre d'acte	charte
Authenticité	non suspect
Datation	1285, 27 novembre
Action juridique	notification
Langue du texte	ancien français

Analyse

Donation par Pierre de Montchaton à l’Hôtel-Dieu de Coutances, pour son obit, d’une rente annuelle de 14 boisseaux et demi de froment, un pain d’un denier, un pain de deux deniers, une geline, un chapon et un denier, sur plusieurs pièces de terre sises à Heugueville (Traduction française de l’époque).

Tableau de la tradition

Éditions principales

a. Le Cacheux Paul, Essai historique sur l’Hôtel-Dieu de Coutances, l’hôpital-général et les Augustines hospitalières depuis l’origine jusqu’à la Révolution avec cartulaire général, Paris, Picard, 1895-1899, 2 vol., t. 2, n° CXIIIbis, p. 106-107..

Texte établi d’après a

A tous ceuz qui ces présentes letres verront et orront, le Visconte de Coustances saluz. — Sachiez touz que, en dreit présent par devant nos, mestre Pierres de Mon-Chaton, clerc, de sa bone volenté, recognut sei aveir donné, otrès et du tout en tout delessié, a fin et en pardurableté, au prior et as frères et as poures de la Meson Deu de Coustances, por le salu de son ame et de ses encessors, et por fere son obit anuelment en ladite Meson Deu, c’est assavoir, quatorze boisseaus et demi de forment, a la mesure de Heuguevile, de anuel rente, a la feste Seint Michiel, et un pein de un denier et une geline et un pein de deus deniers, un capon et un denier torneis à Noel, lesqueles rentes ledit Pierres avoit et apercevoit sus les hommes qui seront ici emprès nommés, par terres que il tenoient de icelui Pierres en foy en ladite parroisse de Heuguevile, si comme il disoit. Premièrement sus Giefroi Du Doit, onze boisseaux et demi dudit forment, et un pein d’un denier et une geline et un pein de deus deniers et j. capon et j. denier torneis à Noel, de treis pièces, de terre, des queles une est assise au Mesnil de Heuguevile, entre la terre as heirs Helyes de Heuguevile, dit de Briquevile, d’un costé, et la terre as heirs Guillaume Godart de l’autre, et bute au chemin as Tangueors d’un chief et au chemin qui est apele le Rosse. La segonde pièce est assise eu Veindin, entre la terre as heirs Robert Hue d’une partie et la terre Ricard Rosselin de l’autre, et bute d’un chief à la terre Auvré Dastin, et de l’autre a la voie par où l’e[n] va de Moulay a Heuguevile et contient vergie et demie de terre. La terce piece est assise as Hommeis entre la terre Robert le Couvreor et la terre Phelipe Andreu des costés et bute d’un chief à la terre dudit Robert et de l’autre as Homeis et contient demie vergie de terre. De rechief sus Ricard le Peletier deus boisseaus dudit forment et deus deniers, por une pièce de terre contenante trois vergies de terre ou la entor, joignante a la terre que Guillaume Helies tient du demoyne nostre Sire le Roy de chascun costé, et bute d’un chief a la Piel et de l’autre a la Masure. Derechief sus Robert du Polet un boisseau dudit froment, por une pièce de terre, contenante une vergie ou la entor, assise au Passeor, devant la Meson Ricard L’oste, entre la terre Ricart Rosselin dun costé et les terres as Dastins de l’autre, et bute d’un chief au chemin as Pastors et de l’autre au doit du Hamel. A tenir, a avoir et a apercevoir dore en avant as devant diz prior, frères et poures de ladite Meson et a lor successors les devant dites rentes, franchement, quitement et paisiblement, o tout le droit et la seignorie que le devant dit Pierres i avoit ou povoit avoir seins, reclam et sans contredit fere dore en avant du devant dit Pierres ne de ses hoirs. Et sunt tenus icelui Pierres et ses heirs as diz prior, frères et poures et a lor successors toutes les choses devant dites défendre, délivrer et garantir envers touz, ou allors eschangier value a value en son propre héritage, se mestier en estoit. Et a cen tenir et aemplir, ledit Pierres oblige sei et ses heirs, et touz ses biens meubles et immeubles présens et a venir. En tesmoing de verité, à la requeste des parties, nos avons scelé ces letres du scel de la Viscomté de Coustances, sauf le dreit nostre sire le Roy et a touz autres, ensemble ové le scel dudit Pierres : Ce fut fet l’an de grace mil et deus cenz et quatre vinz et cinc, eu jor de mardi devant la feste seint Andreu apostre.

Pour citer l'acte :

« Acte 2514 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_2514.html [consulté le 09/05/2024].

Création de la fiche

2007-06-05

Dernière mise à jour

2023-12, EMancel