Scripta n° 1356

Numéro Scripta	1356

Auteur(s)	Bayeux (vicomte)
Bénéficiaire(s)	Adam de Paris, Hyèmes (archidiacre)

Genre d'acte	charte
Authenticité	non suspect
Datation	1287, 12 avril
Lieu d'émission	Bayeux
Action juridique	notification
Langue du texte	ancien français

Analyse

Jean de Tessel, chevalier, reconnaît la vente faite par la veuve de Guillaume de Ragny au chanoine de Bayeux Adam de Paris d’une rente d’avoine sur une portion de dîme à Saint-Georges d’Aunay.

Tableau de la tradition

Éditions principales

a. Bourrienne Valentin (Abbé), Antiquus cartularius ecclesiæ Baiocensis (Livre noir), Rouen-Paris, Lestringant-Picard (Société de l’histoire de Normandie), 1902-1903, 2 vol., n° DLXXXIII, t. 2, p. 345-346..

Texte établi d’après a

A touz cels qui ces letres verrunt, le visconte de Baiex, saluz. Sachiez que monseignor Johan de Tessel, chevalier, seignor de Tessel, establi par devant mei, recognut que il a otrée à home honorable à mestre Adam de Paris, chanoine et archediacre en l’iglise Nostre Dame de Baiex, que il et ses hers, et touz cels qui aureient cause de lui, aient, tiengent et possièthent desorénavant, affin et en perpétuel, sept sextirs et une mine de aveine, à la mesure de Saint Geoire joste Auney, d’anuel rente, d’an en an, à la feste saint Michiel en septembre, par sa main et par la main de ses hers, es fruiz de la disme que il a et deit aveir en terroor de Saint Geoire joste Aunay, et justice en la dite disme et en lieu où ele sereit mise en chescun avestage, chescune feiz que mestier en sereit, por le dit anuel rente aveir ; por chen que madame Perronnele, jadis femme monseignor Guillame de Raigny, chevalier, par le consentement de Raol de Raigny, escuier, et de mon seignor Nichole de Raigny, ses fiz, le vendirent au dit mestre Adam de Paris par vint et sis livres de Torneis, si comme il est contenu en une letre seelée deu seel de la viscontei de Baiex ; lequel anuel rente fu donné, à mariage, à la dite madame Perronnele, de monseignor Robert de Teissel, peire au dit monseignor Johan: à tenir, à aveir, à posseer à fin et à héritage, le dit anuel rente en la dite disme au dit mestre Adam et à ses hers, et à touz qui aureient cause de lui portant ces letres, et la justice, sanz contredit et sans empeechement deu dit monseignor Jehan et de ses hers, franchement, quitement, bien et em pez de toutes choses, en tele manière que le dit monseignor Jehan et ses hers sunt tenuz et deivent desorénavant le dit anuel rente en la dite disme au dit mestre Adam et à ses hers, et à touz cels qui aureient cause de lui, o la justice, garantir et défendre contre touz, et délivrer et descombrer envers touz de toutes choses, et garder les en de touz damages, ou eschangier en le héritage que le dit monseignor Johan a, et deit aveir et poet, où que il seit en en (sic) la dite parroisse de saint Geoire. Et à ces convenanz tenir, fornir et aemplir, le dit monseignor Johan obliga par devant mei se et ses hers, et touz ses biens muebles et non muebles, où que il seient, présens et à venir. Et, en tesmoig de cen, ceste letre est seelée deu seel de la visconté de Baiex, à la requeste des parties, sauve la dreiture le Rey et autrui, oveques le seel au dit monseignor Johan. Ce fu fait en l’an de grâce mil ijc quatre vinz et sept, le samedi après cluses Pasques.

Pour citer l'acte :

« Acte 1356 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_1356.html [consulté le 09/05/2024].

Création de la fiche

2006-05-18

Dernière mise à jour

2023-12, EMancel