⇪PDF

Scripta n° 4733

Numéro Scripta4733
Auteur(s)Honorius III [pape]
Bénéficiaire(s)Cîteaux (ordre)
Genre d'actebulle
Authenticiténon suspect
Datation1219, 26 septembre
Lieu d'émissionRéaté
Action juridiqueautre
Langue du texte latin

Analyse

Honorius III enjoint aux évêques et prélats de faire respecter les priviléges et indulgences accordés par le Saint-Siège aux religieux de l’ordre de Cîteaux.

Tableau de la tradition

Éditions principales

a. Andrieux Jules, Cartulaire de l’abbaye royale de Notre-Dame de Bon-Port de l’ordre de Cîteaux au diocèse d’Évreux, Évreux, Hérissey, 1862, n° LIII, p. 54-55..

Texte établi d’après a

Honorius, episcopus, servus servorum Dei, venerabilibus fratribus archiepiscopis et episcopis et dilectis filiis aliis ecclesiarum prelatis, ad quos littere iste pervenerunt, salutem et apostolicam benedictionem.
Benefaciens Dominus bonis et rectis corde dilectos filios fratres Cisterciensis ordinis in viam mandatorum ejus inoffense currentes, tanquam populum acceptabilem sibi numero et merito ampliavit, eisque de rore celi et terre pinguedine benedicens dilatavit locum tentorii ejusdem ordinis, et pelles tabernaculorum ejus extendit. Sed, quod dolentes referimus, in via hac qua ambulant superbi contra eos laqueos extendentes, immo velut torrentes iniquitatis irruentes in eos ipsos bonis suis, que soli Domino sunt dicata, non solum nequiter defraudare cum filii hujus seculi prudentiores filiis lucis in generatione sua sint, verum eciam iniquitate potentes violenter spoliare nituntur ; et, quod gravius est, nonnulli de hiis qui eos debuerant in ipsis visceribus carius amplexari et favorabilius confovere ipsos immanius persequentes privilegia que ipsis a sede apostolica suis exigentibus meritis sunt indulta gestiunt penitus enervare, dicendo illa fuisse omnino in generali concilio revocata ; vel alias intellectum privilegiorum ipsorum ita maligna interpretatione ad libitum pervertendo, quod nisi eos iniqua loquencium obstruatur, cum predicti fratres privilegiorum suorum pene penitus fructu frustrentur, per quod illi non tam eisdem fratribus quam nobis injuriati probantur, dum contra sedis apostolice indulgencias, memoratos fratres temere perturbare presumunt, molientes contra nostre plenitudinem potestatis, dum indulta nostra irreverenter impugnant.
Nos igitur, qui predictos fratres speciali prerogativa dilectionis et gracie amplexamur, ut pote qui jugiter offerentes domino suorum vitulos labiorum non solum nobis, sed eciam universali ecclesie piis intercessionibus incomparabiliter suffragantur, nolentes hujusmodi vexationibus eorum sabbati amaricari quietem quos pocius tenemus omnimodis consolari, universitatem vestram monemus et hortamus attente, ac per apostolica scripta precipiendo mandamus, quatinus supradictos fratres ob reverenciam divinam et nostram habentes in visceribus caritatis, eis privilegia et indulgencias apostolice sedis eisdem concessas inviolabiliter conservetis et faciatis ab aliis conservari. Salva moderatione concilii generalis, videlicet ut de alienis terris a tempore predicti concilii acquisitis, et de cetero acquirendis exsolvant decimas ecclesiis quibus ratione prediorum antea solvebantur, nisi aliter cum eis duxerint componendum, alias quoque dictos fratres ab incursibus malignorum taliter defendatis, quod defensores justicie ac pietatis probemini amatores. Deumque vobis propicium et nos reddatis exinde favorabiles et benignos.
Datum Reatis, VI kalendas octobris, pontificatus nostri anno quarto.

Pour citer l'acte :

« Acte 4733 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_4733.html [consulté le 22/12/2024].

Création de la fiche

2009-02-01

Dernière mise à jour

2023-12, EMancel