Scripta n° 5727

Numéro Scripta	5727

Auteur(s)	Rouen (bailli)
Bénéficiaire(s)	Rouen, Saint-Ouen (abbaye)

Genre d'acte	charte
Authenticité	non suspect
Datation	1285
Action juridique	autre
Langue du texte	ancien français

Analyse

Le bailli de Rouen fait savoir qu’Hue de Periers a été condamné, pour la raison qu’il avait manqué de faire en l’ost de Sauveterre le service d’ost qu’il devait à l’abbaye Saint-Ouen de Rouen à cause de la terre qu’il tenait de ladite abbaye.

Tableau de la tradition

Éditions principales

a. Delisle Léopold, Passy Louis, Mémoires et notes de M. Auguste Le Prévost pour servir à l’histoire du département de l’Eure, Évreux, Hérissey, 1862-1869, 3 vol., t. 2, p. 526-527..

Texte établi d’après a

A touz ceus qui ces lettres verront, le baillif de Rouen, salut. Comme l’abbé et le couvent de Saint-Ouen de Roem deissent contre Hue de Periers, escuier, que eus l’avoient semons que il venist, à un jour qui passa, en armes et en chevaus à Saint-Oein de Roem souffisamment, pour aler et pour fere le servise en l’ost de Sauveterre, du fyé et de la terre que il tient de eus par servise d’ost, lequel fyé et laquele terre a esté souffisamment veue, si comme il a esté conneu des parties, et duquel ost les diz abbé et couvent avoient esté semons par le commandement le roy, le dit escuier vint au jour bien et souffisaument en armes et en chevaus. Après, commandé li fu des diz abbé et couvent que il allast eu dit ost, pour le service fere que il lour devoit, au besoing le roy et à son commandement, du fyé que il tient de eus, qui veu a esté soufisaument, si comme il est desus dit. Deffailli s’estoit le dit escuier de fere le dit service, si que par son deffaut les ditz abbé et couvent firent faire ledit service à lor deniers, por quoi, se cen lor estoit conneu, il vouleient que il lor amendast la deffaute et rendist avenamment cen que eus i avoient mis par son deffaut ; se il lor estoit néé, eus l’offreient à prover si avant comme eus devroient. Et le dit escuier deist que il connoisseit bien que semons avoit esté des diz abbé et couvent de venir en armes et en chevaus por le dit servise fere ; venuz estoit soufisaument en armes et en chevaus ; et bien connoisseit que commandé li avoient que il alast avant eu servise de l’ost à Sauveterre, et disoit que tout n’i fust-il pas alé, si n’en vouleit il fere amende, ne rendre chose que l’abbé et le couvent i enssent mis du lour ; quar, quant il se fu souffisaument offeri en chevaus et en armes, il lor requist que ses chevaus fussent prisiez, et que eus li baillassent certain conduit qui ses despens li feist des deniers à l’abbé et au couvent, et il estoit prest au dit service fere, et offreit le cors et les chevaus. Et por cen que eus ne li voudrent ses chevaus fere prisier, ne baillier qui ses despens li feist, il n’ala pas avant. Pour quoi le dit escuier disoit que les diz abbé et couvent ne li poaient, ne ne devoient demander amende, ne n’estoit tenu à rien rendre lour de chose que eus i eussent mis por lui, por deffaute que eus li meissent sus. Les resons oyes d’une partie et d’autre, en jugement se mistrent. Et, selon les resons des devant dites parties, il fu jugié en l’eschiquier de Pasques et pronunchié par jugement enterignement por les devant diz abbé et couvent contre le dit escuier, et que le devant dit escuier et ses heirs feront dès ore en avant à lour propres despens le devant dit servise à l’abbé et au couvent desus diz et à lors sucessours. Et amenda le dit escuier le jugement attendu. En tesmoing de laquele chose, nons avon mis à ces lettres, par le commendement de hommes honorable les mestres du devant dit eschiquier, le seel de la baillie de Roem, sauf le droit le roy et l’autrui. Ce fu fet en l’an de grace mil deus cens quatre vinz et cinc, en l’eschiquier desus dit.

Pour citer l'acte :

« Acte 5727 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_5727.html [consulté le 18/12/2024].

Création de la fiche

2010-03-08

Dernière mise à jour

2023-12, EMancel