Scripta n° 2534

Numéro Scripta	2534

Auteur(s)	Coutances (vicomte)
Bénéficiaire(s)	Coutances (hôtel-Dieu)

Genre d'acte	charte
Authenticité	non suspect
Datation	1298, 14 novembre
Action juridique	notification
Langue du texte	ancien français

Analyse

Vente par Thomas Martin, de Flottemanville, à l’Hôtel-Dieu de Coutances, pour trente-quatre livres tournois, d’une rente annuelle de trente-et un boisseaux et demi de froment, dix œufs et cinq sous tournois, à percevoir dans ladite paroisse.

Tableau de la tradition

Éditions principales

a. Le Cacheux Paul, Essai historique sur l’Hôtel-Dieu de Coutances, l’hôpital-général et les Augustines hospitalières depuis l’origine jusqu’à la Révolution avec cartulaire général, Paris, Picard, 1895-1899, 2 vol., t. 2, n° CXXXI, p. 128-130..

Texte établi d’après a

A tous ceux qui ces lettres verront et orront, le Visconte de Coustances, saluz. Sachent touz que, en droit présent par devant nos, Thomas Martin, de Flotemanville joste Valoignes, de son grei recognut soi avoir vendu, otroié et delessié, a fin, a hommes religious, au prior et as freires et as poures de la Meson Deu de Coustances, trente et un boisselz et demi de froment, a la mesure de Flotemanville, d’anuel rente à la feste Saint Michiel, neuf deniers et une geline à Noel, dies œus à Pasques et cinc souz de torneis à la feste Saint Martin d’esté, dont Guillaume Ugart doit sept boisselz et demi sus trois pièces de terre contenantes demie acre et demie verge ou la entor, desquelles la première pièce joint as terres audit Thomas et Richart Eude et bute à l’Esclotoie deu Coisel, la seconde joint as terres audit Thomas et Thomas le Bort, et bute au chemin par quoi l’en va à Valoignes, et la tierce joint as terres Thomas Baudouin et Thomas Poisson et bute a la voie de Quiedefer ; Richart Eude en doit un quartier sus une pièce de terre contenante trois verges ou la entor, assise en la parroisse de Flotemanville, et joint as terres Guillaume Heribel et as hoirs Guillaume le Bourc, e bute à la rue de Flotemanville ; Thomas de Quiefdefer en doit un boissel et un denier sus une pièce de terre, contenante une verge et demie ou la entor, assise en ladite paroisse et joint as terres Richard de Quiefdefer et Raoul deu Hamel, et bute as terres audit Richart ; Engerran l’Orme en doit deus boisselz, un pain de deus deniers et une geline o son hommage, sus une meson qui joint a la terre Thomas Poisson ; item deus boisselz sus une pièce de terre contenante une vergie ou la entor, e joint as terres audit Engerran et Johan Robin ; Thomas Maugier en doit un boissel sus son mesnage, qui joint a la meson a l’Abei ; Thomas Eude en doit deus boisselz et quatre souz sus deus pièces de terre dont l’une est es Gachières et joint as terres audit Richart, et l’autre est outre le Mostier et joint à la terre audit Richart, et bute au chemin Perré ; Guillaume Sirot en doit deus boisselz sus une vergie de terre assise à l’Essart Héron, et joint as terres Richart Maugier et Bordet Sirot et bute au chemin le Roy ; Boudet Sirout en doit deus boisseax sus une vergie de terre, qui joint as terres Guillaume Sirot et Garin Pevrel, et bute au chemin le Roy ; Guillaume de Pierrevile en doit un boissel sus une pièce de terre ; Richart Heribel en doit douze deniers sus une pièce de terre qui joint as terres Richart Labei et Guillaume Heribel, et bute à la voie Bequet ; les hoirs Raoul Flori en doivent quatre deniers sus demie acre de terre qui joint as terres Thomas Eude et Thomas Flori et bute à la voie Caucher ; les hoirs Richart Guesdon en doivent un quartier, o leur hommage, sur trois pièces de terre, dont la première joint as terres au Machon et Raoul Durel, la seconde joint a la terre Guillaume le Borut et la tierce est au Faudeis et joint a la terre Richart Labei, et bute a la terre Guillaume le Borut ; Richart Karuel en doit deus boisseaux, o son hommage, sus deus pièces de terre, desquelles la premiere joint as terres Richart Burnel et bute a la terre Guillaume Erquembout, escuier, et la segonde joint à la terre Richart Karuel et bute a la rue deu Hamel as Poupins ; et Thomas Eude en doit un boissel, o son hommage, sus une pièce de terre, assise a la Crote Guesdon, et joint as terres audit Thomas et Thomas Flori et bute a la terre Engerran l’Orme. — O tout le droit et la justice que ledit Thomas Martin i avoit et povoit avoir et devoit, pour trente et quatre livres de tornés, dont ledit Thomas se tint pour bien paié par devant nos, lesquels deniers lesdiz prior et les frères et les poures avoient euz deu don Richart Bordeax et Nicole sa fame, a fere leur obit chescun an en ladite Meson Deu de Coustances. — A tenir, a avoir et a porséer par droit héritage, asdiz prior et les frères et as poures et a leurs successors lesdites rentes, o les hommages, le droit et la justice dessusdiz, bien et empés, des ore en avant, sanz nul contredit. Et sont et seront tenuz ledit Thomas et ses hoirs, as diz prior et as frères et a poures et a lours successors, lesdites choses garantir, délivrer et deffendre encontre touz en bone foy, ou aillors value a value eschangier, se mestier en estoit. Et quant a cen tenir et aemplir as diz prior et les frères et as poures et a lour successors, ledit Thomas obliga par devant nos soi et ses hoirs, son corps a tenir prison et touz ses biens meubles et non meubles, présenz et avenir, ou que il soient, a vendre et a despendre par la justice le Roy, pour deffaute d’enterigner les choses dessus dites ; e pour les couz et les despens rendre et restorer, qui en seroient feiz, dont le portoor de ces letres seroit creu par son serement, sanz autre preuve. Et renunça, quant à cen, ledit Thomas a tout privilège de croiz prise et a prendre et a toutes exceptions et deffenses de fait et de droit. Et en tesmoing de cen, nos avons mis a ces letres le scel de la viscontei de Coustances, o le scel audit Thomas, sauf le droit nostre sire le Roy et autri. Cen fut fait l’an de grace mil CC nonante et oict, le vendredi après la feste Saint Martin d’iver. Sig. [ ] XXXIIII d.

Pour citer l'acte :

« Acte 2534 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_2534.html [consulté le 09/05/2024].

Création de la fiche

2007-06-05

Dernière mise à jour

2023-12, EMancel