Scripta n° 2950

Numéro Scripta	2950

Auteur(s)	Valognes (vicomte)
Bénéficiaire(s)	Robert Bertran, chevalier, Bricquebec (seigneur)

Genre d'acte	charte
Authenticité	non suspect
Datation	1292, 7 août
Action juridique	notification
Langue du texte	ancien français

Analyse

Guillaume de Méautis, chevalier, abandonne à Robert Bertran, chevalier, sire de Bricquebec, le manoir des Perques, tenu pour un tiers de fief, en échange du Homme.

Tableau de la tradition

Éditions principales

a. Bréard Charles, Cartulaires de Saint-Ymer en Auge et Bricquebec, publiés avec notices, Rouen-Paris, Lestringant-Picard, 1908, Bricquebec, n° 66, p. 252-254..

Texte établi d’après a

Envers le visconte de Valoignes.
A tous ceux qui ces présentes lettres verront et orront, le visconte de Valoignes, salus. Sachiez que homme noble monseignour Robert Bertran, chevalier, seignour de Briquebec, et monseignour Guillaume de Méautiz, chevalier, reconnurent de lor volentés présens en droit pardevant moy que eus ont fet eschange entre euz deu manoir des Perques et de la ville deu Homme en la manière qui ensuit : ce est à savoir que ledit monseignour Guillaume baille, assigne, quitte et deleit por li et por ses eirs audit monseignour Robert Bertran et à ses eirs ledit manoir des Perques avec toute la droiture, la seigneurie et la justice et les apartenances audit manoir qui pooient et devoient appartenir audit monseignour Guillaume por la reson dudit manoir et de la seignourie appartenante audit manoir que ledit monseignour Guillaume tenoit par hommage par le tiers d’un fieu de chevalier dudit monseignour Robert. Et ledit monseignour Robert baille, assigne et deleit afin por li et por ses hoirs audit monseignour Guillaume et à ses eirs por ce la vile deu Homme avec toutes les droitures et les appartenances à laditcte vile que ledit monseignour Robert y avoit, pooit et devoit avoir, exceptees la visconté, la haute justice et le resort de li et de ses hommes que ledit monseignour Robert por li et por ses eirs retient par devers soi ; en telle manière que ledit monseignour Guillaume et ses eirs feront des ore en avant de ladite vile deu Homme auteles services et autels redevances audit monseignour Robert et à ses eirs, comme ledit monsignour Guillaume fesoit et étoit tenu à fère deudit manoir des Perques audit monseignour Robert anchoiz que eulz faissent eschange entre euz dudit manoir des Perquez de la vile desus dis. Delaquele vile desus dite ledit monseignour Guillaume et ses eirs rendront des ore en avant annuelment audit mon seignour Robert et à ses hoirs quarante soulz de tournois d’annel rente à la feste saint Michiel por le sorcroiz des rentes de l’eschange desus dit, lequel eschange les chevaliers desus nommez et lor eirs sont tenuz et seront des ore en avant à garantir, à délivrer et à deffendre les uns deus as autres entièrement et fermement sans déchie et sans amenisement en la manière que il est desus devisé contre et envers tous ou eschangier allors value à value en lors propres héritages se mestier en estoit et à rendre les coux et les despens que les uns deus feroient contre les autres. En défaute de ce et quant as choses desus dites tenir et garder en bonne foy ledit mon seignour Robert et ledit mon seignour Guillaume obligent eulz et lor eirs et tous lors biens meubles et immeubles présens et à venir à prendre par la justice le roy à vendre et à despendre por ce, se mestier en estoit ; et renoncent à toute exception de feit, de droit e de coutume d’eschange ne mie fete entre eus en la manière qui est desus devisé et à toutes autres. En tesmoing de laquele chose et que ce soit ferme et estable de sore en avant, je ai seelé ces lettres deu seel de la visconté de Valoignes, à la requeste des parties, avec lor propres seaus, sauf le droit nostre sire le roy e autruy. Ce fut fet l’an de grâce mil deus cens quatre vins e doze, le mercredi devant la Décollation saint Jehan Baptiste, ou mois d’aoust.

Pour citer l'acte :

« Acte 2950 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_2950.html [consulté le 22/12/2024].

Création de la fiche

2007-12-18

Dernière mise à jour

2023-12, EMancel