⇪PDF

Scripta n° 5047

Numéro Scripta5047
Auteur(s)Eugène III [pape]
Bénéficiaire(s)Vivien, Aunay-sur-Odon, Notre-Dame d’Aunay (abbaye, abbé)
Genre d'actebulle
Authenticiténon suspect
Datation1152, 5 novembre
Lieu d'émissionAlbano
Action juridiqueconfirmation
Langue du texte latin

Analyse

Le pape Eugène [III] prend l’abbaye d’Aunay sous sa protection et confirme les biens et droits de l’abbaye.

Tableau de la tradition

Éditions principales

a. Le Hardy Gaston, Étude sur la baronnie et l’abbaye d’Aunay-sur-Odon, Caen, H. Delesques, 1897, Pièces, n° 3, p. 255-258..

b. Ramackers Johannes, Papsturkunden in Frankreich, Neue Folge 2 Normandie, Göttingen, Vandenhoeck & Ruprecht (Abhandlungen der Gesellschaft der Wissenschaften zu Göttingen. Philologisch-historische Klasse, 21), 1937, 2 vol., n° 62, p. 138-140..

Texte établi d’après b

EVGENIVS EPISCOPVS SERVVS SERVORVM DEI. DILECTIS FILIIS VIVIANO ABBATI DE ALNETO EIVSQVE FRATRIBVS TAM PRESENTIBVS QVAM FVTVRIS REGVLAREM VITAM PROFESSIS IN PERPETVVM. Quotiens illud a nobis petitur, quod religioni et honestati conuenire dinoscitur, animo nos decet libenti concedere et petentium desideriis congruum impertiri consensum. Eapropter, dilecti in domino filii, uestris iustis postulationibus benignum impertientes assensum prefatam ecclesiam, in qua diuino mancipati estis obsequio, sub beati Petri et nostra protectione suscipimus et presentis scripti priuilegio communimus. Statuentes, ut quascunque possessiones, quæcunque bona eadem æcclesia in presentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis Deo propitio poterit adipisci, firma uobis uestrisque successoribus et illibata permaneant. In quibus hec propriis duximus uocabulis annotanda : ex dono Iordani de Saeio partem forestæ, sicut proxima uia transcendit montem de Lenche, cum tota terra, sicut torrens descendit in Odonis fluuium, et totam terram, quam tenuit Sanson frater Luciæ a Radulfo de Burone, ex dono Gileberti filii eiusdem Iordani totam terram, quam habuit in Venniis, quam tenuit Gaufridus de Marinneio, ex dono Luciæ matris eius centum acras terræ suæ de Alneio et pratum unum iuxta molendinum uestrum, ex dono Ricardi de sancto Remigio pratum unum, qui etiam ratas habuit donationes suorum hominum, qui dederunt uobis duodecim acras terre liberas et quietas confirmante hoc nobilis memoriæ Gaufrido Andegauensium comite, concessit etiam uobis idem Ricardus clusam molendini uestri et apud sanctum Symeonem de Supramare triginta acras terræ de propria hereditate sua concedentibus et confirmantibus uxore sua et Gundeuuino filio eius, ex dono Roberti de sancto Remigio et fratrum eius quendam locum iuxta Tormeium, qui uocatur sanctus Nicholaus, pratum unum et duas carrucatas terræ, ex dono Willelmi de Sola unum locum, qui uocatur Bonfosse, et septuaginta duas acras terræ, ex dono Roberti Britonis de Maisuncellis totam terram, quam habuit in uillula supra montem Enke, ex dono Engeranni de Port uiginti acras terræ ad Vndefontem et communia pascua pecoribus uestris, quas nimirum donationes ratas habuit Iordanus Tayson heres ipsius, ex dono Radulfi de Chahineiis uiginti acras terræ apud Chahin(eios), ex dono Willelmi filii Orengiæ terram, quam habuit in Lauda, et ex dono Aluredi filii Symonis et uxoris eius quinque acras terræ in loco, qui dicitur sanctus Nicholaus, preterea in parrochia sancti Georgii ex dono Roberti de Matonio decem acras terræ et communia pascua eiusdem parrochiæ pecoribus uestris. Sane laborum uestrorum, quos propriis manibus aut sumptibus colitis, siue de nutrimentis uestrorum animalium nullus a uobis decimas presumat exigere. Decernimus ergo, ut nulli omnino hominum liceat prefatam ecclesiam temere perturbare aut eius possessiones auferre uel ablatas retinere, minuere seu aliquibus uexationibus fatigare, sed illibata omnia et integra conseruentur eorum, pro quorum gubernatione ac sustentatione concessa sunt, usibus omnimodis profutura. Si qua igitur in futurum ecclesiastica secularisue persona hanc nostræ constitutionis paginam sciens contra eam temere uenire temptauerit, secundo tertioue commonita, nisi presumptionem suam congrua satisfactione correxerit, potestatis honorisque sui dignitate careat reamque se iuditio diuino existere de perpetrata iniquitate cognoscat et a sacratissimo corpore ac sanguine Dei et domini redemptoris nostri Iesu Christi aliena fiat atque in extremo examine districtæ ultioni subiaceat. Cunctis autem eidem loco sua iura seruantibus sit pax domini nostri Iesv Christi, quatenus et hic fructum actionis bonæ percipiant et apud districtum iudicem premia æternæ pacis inueniant. AMEN. AMEN. AMEN.
R. Ego Evgenius catholicæ ecclesiæ episcopus ss. BV.
† Ego Ymarus Tusculanus episcopus ss.
† Ego Aribertus presb. card. tit. sanctæ Anastasie ss.
† Ego Wido presb. card. tit. Pastoris ss.
† Ego Bernardus presb. card. tit. sancti Clementis ss.
† Ego Iohannes Paparo presb. card. tit. sancti Laurentii in Damaso ss.
† Ego Henricus presb. card. tit. sanctorum Nerei et Achillei ss.
† Ego Oto diac. card. sancti Georgii ad uelum aureum ss.
† Ego Gregorius diac. card. sancti Angeli ss.
† Ego Iohannes diac. card. sanctorum Sergii et Bachi ss.
† Ego Ildebrandus sanctæ Romane ecclesiæ diac. card. ss.
† Ego Gerardus sancte Romane ecclesie diac. card. ss.
Dat. Albe per manum BOSONIS sanctæ Romanæ ecclesiæ scriptoris non. nouembr., indictione XV, incarnationis dominicæ anno Mº.Cº.Lº.IIº, pontificatus uero domni EVGENII PAPE III anno octauo.

Pour citer l'acte :

« Acte 5047 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_5047.html [consulté le 09/05/2024].

Création de la fiche

2009-03-08

Dernière mise à jour

2023-12, EMancel