Scripta n° 2529

Numéro Scripta	2529

Auteur(s)	Coutances (vicomte)
Bénéficiaire(s)	Coutances (hôtel-Dieu)

Genre d'acte	charte
Authenticité	non suspect
Datation	1294, 10 mai
Action juridique	notification
Langue du texte	ancien français

Analyse

Silvestre Simon et Jeanne sa femme, de Périers, assignent à l’Hôtel-Dieu de Coutances, une rente annuelle de vingt boisseaux de froment à Saint-Sauveur l’Endelin et à Hémesvez.

Tableau de la tradition

Éditions principales

a. Le Cacheux Paul, Essai historique sur l’Hôtel-Dieu de Coutances, l’hôpital-général et les Augustines hospitalières depuis l’origine jusqu’à la Révolution avec cartulaire général, Paris, Picard, 1895-1899, 2 vol., t. 2, n° CXXVIbis, p. 124-125..

Texte établi d’après a

A touz ceus qui ces presentes letres verront et orront, le visconte de Coustances saluz. Sachent touz que, en droit par devant nos présenz, Sevestre Symon et Johenne sa femme de Périers, auctoritei donnée à ladite Johenne de son mari par devant nos à cen qui ensuit, de lor grei recognurent euls, chescun por tout, avoir donnei, otroié et delessié, en pur don et en pure aumosne, au prior et es freires de la meson Dieu de Coustances ; c’est assavoir vint boisseaux de forment de anuel rente, a la feste seint Michiel, et les regarz ci-dessoz nommeiz, des queles choses Raoul Baucen, de Seint-Sauveur Lendelin, rendoit et estoit tenu rendre as diz Sevestre et Jehane sept boisseaus de forment, a la mesure de Coustances, pour tel tenement comme il tenoit de icels par hommage, en la dite parroisse de seint Sauveor ; Robert et Thomas, diz Leroy, quatre boisseaus, a la mesure de Périers, deus pains et deus gelines de regart, por le tenement que il tenoient de icels ; Guillaume Gaaigne bien, de Heimmesvez, sis boisseaus de forment, a la mesure de la dite vile, deus pains et deus gelines ; e Guillaume le Tallant un boisseau de forment, oveques les hommages, le droit, la justice, la reson e la seignorie, que les diz Sevestre et Johenne i avoient e poveent e devoient avoir ; a tenir, a avoir e a posséer as diz prior e freires e a lor successors les choses desus dites, bien e empes, franchement e quitement, sanz nul contredit, sauf le droit es chiés seignours. E sont tenuz e seront lez diz Sevestre et Johane e lor hers, as diz prior e freires e a lor successors, les dites choses garantir, delivrer et deffendre encontre touz en boene foy, ou allors value a value eschangier, se mestier en estoit, en tout ou partie. E quant a cen tenir e a emplir as diz prior e frères e a lor successors, les diz Sevestre et Johene, obligèrent par devant nos, chescun por tout, eus e lor hers, lor cors a tenir prison, e touz lor biens meubles e non meubles présenz e a venir, ou que il soient, a vendre e a despendre par la justice le roy, por deffaute de enterignier les choses desus dites ; e pour les couz et les demmages rendre e restorer, qui en seroient fez e soustenuz, donc le portoor de ces letres seroit creu par son serement, sanz autre proeve. E renoncèrent quant a cen, les diz Sevestre e Johene, a tout previlège de croiz prise e apprendre et a toutes exceptions et deffenses de fet e de droit. E jura sus seinz la dite Johane que jamès encontre cest don ne vendra, ne empeechement ni metra, ne ne demandera douaire, mariage encombrer ne autre chose es rentes e regarz desus diz. E vout e otria que toute audience li fust devoiée e fust punie comme par juge, se ele venoit jamès encontre les convenances desus dites. E en tesmoing de cen, nos avons mis a ces letres le seel de la visconté de Coustances, sauf le droit nostre sire le roy e autre, o les seaus asdiz Sevestre e Johene. Cen fut fet l’an de grace mil CC nonante e quatre, le lundi emprès la feste seint Nicholas en may.

Pour citer l'acte :

« Acte 2529 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_2529.html [consulté le 21/11/2024].

Création de la fiche

2007-06-05

Dernière mise à jour

2023-12, EMancel