Scripta n° 2530

Numéro Scripta	2530

Auteur(s)	Coutances (vicomte)
Bénéficiaire(s)	Coutances (hôtel-Dieu)

Genre d'acte	charte
Authenticité	non suspect
Datation	1295, 5 mars
Action juridique	notification
Langue du texte	ancien français

Analyse

Richard Du Fresne vend un quartier de froment à l’Hôtel-Dieu de Coutances, pour qu’il soit mis trois cierges ardants en la chapelle Notre-Dame, quand on fera le service.

Tableau de la tradition

Éditions principales

a. Le Cacheux Paul, Essai historique sur l’Hôtel-Dieu de Coutances, l’hôpital-général et les Augustines hospitalières depuis l’origine jusqu’à la Révolution avec cartulaire général, Paris, Picard, 1895-1899, 2 vol., t. 2, n° CXXVII, p. 125-126..

Texte établi d’après a

A tous ceus qui ces letres verront et orront, le Visconte de Coustances, saluz. Sachent touz que en droit par devant nos présenz, Richart Deu Fresne, de Coustances, et Perrenele sa femme, o l’auctoritei deu dit Richard donnée a ladite Perrenele as choses qui ensuient, de lor grei recognurent eus, et chescun por tout, avoir vendu, otroié et delessié, a fin et en perpétuel héritage, au prior et as freires de la Meson Dieu de Coustances, un quartier de froment a la mesure de Coustances, de rente a la Seint-Michel, en cas amenuisant de la rente que il rendoient et fesoient asdiz Richart et Perrenele, por une piece de terre contenante trois verges, en la parroesse Seint-Pierre de Coustances, qui joint de un costei et bute des bouz as terres as diz prior et freires, et joint d’autre part a la rue de la Quibouquiére, pour ooït souz de torneis, donc lesdiz Richart et Perrenele se tindrent por paez, les quex deniers lesdiz prior et freires avoient euz deu don Anthoine Lebouvier, borgeis de Coustances, por trouver en ladite meson, en la chapelle Nostre-Demme, trois cierges qui ardront, toutes fois que le service Nostre-Demme sera celebrei. E en deivoient encore lesdiz prior et fréres en l’ommage desdiz Richart et Perrenele en deus boisseaus de forment de rente. Cest assavoir que lesdiz Richart et Perrenele s’obligèrent a garantir et acquiter ladite terre envers touz de toutes autres rentes ; e obligèrent a cen une piéce de terre contenante une vergie et sept perches, assise entre les terres asdiz prior et freires et les terres Leinznei, sus laquele lesdiz prior et frères et lor successors porroient fere lor justice, por tant comme il seroient justiciez sus l’autre por autres rentes. A tenir et avoir et a posséer asdiz prior et frères et a lor successors ledit quartier de forment, bien et empès, sanz nul contredit. E sont tenuz et seront lesdiz Richart et Perrenele et lor heirs garantir le asdiz frères et prior et a lor successors et défendre envers touz ou eschangier, se mestier en estoit. E quant a cen tenir et a emplir, il obligèrent, chescun por tout, eus e lor heirs, lor cors a tenir prison e touz lor biens meubles et non meubles, presenz et a venir, ou que il soient, a vendre et a despendre par la justice le Roy, pour deffaute de enterigner les choses dessus dites ; e por les couz e les despens rendre, donc le portoor de ces letres seroit creu par son serment, sanz autre proeve. E renuncèrent a tout privilège de croiz et a toutes exceptions et deffenses de fet e de droit. E jura sus seinz ladite Perrenele que jamès encontre les convenances dessus dites ne vendra, par reson de douaire, de mariage encombré ne autrement. E vout et otria que toute audience li soit dévoiée, et soit punie comme parjure, se ele venoit encontre. E en tesmoing de cen, nos avons mis a ces letres le seel de la visconté de Coustances, o le scel audit Richart et a ladite Perrenele, sauf le droit Nostre Sire le Roy et autre. Cen fut fet lan de grace mil CC nonante e quatre, le samedy après le dymenche que l’on chante Reminiscere.

Pour citer l'acte :

« Acte 2530 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_2530.html [consulté le 09/05/2024].

Création de la fiche

2007-06-05

Dernière mise à jour

2023-12, EMancel