Scripta n° 3673

Numéro Scripta	3673

Auteur(s)	Rouen (maire)
Auteur(s)	Rouen (ville)

Genre d'acte	charte
Authenticité	non suspect
Datation	1266
Action juridique	autre
Langue du texte	ancien français

Analyse

Le maire et les citoyens de Rouen notifient les droits sur les marchandises étrangères dont ils jouissent avec le consentement de Louis [IX], roi de France. 

Tableau de la tradition

Éditions principales

a. Delisle Léopold, Cartulaire normand de Philippe-Auguste, Louis VIII, Saint-Louis et Philippe le Hardi, Caen, Hardel (MSAN ; 16, 2e série, 6, p. 160-390), 1852, n° 721, p. 159-160..

Texte établi d’après a

A touz ceus qui ces presentes lestres verront et ornont, le mere et les citeiens de Roen, saluz et amour en nostre Seigneur pardurable. Sachiez touz que, par l’acort de nostre sire Lois, par la grace de Dieu, rei des Franceis, et de nous, a este essint ordené que jusques a la fin de II anz procheinement et continuement ensuianz, le terme commanchant a ceste feste Seint Michiel procheine a venir, touz marchaanz de par toutes terres porront amener a Roen leurs marchaandises par yaue et par terre et porront icelles marchaandises a Roen descharchier a sesche terre, et en couvert et les porront vendre en gros a qui que il voudront fors a ceus a qui il auraient part ou compagnie de yces marchaandises, ne ne porront yces marchaandises vendre a terre ne en couvert en Roen ne en la banlieue a detail si comme vin a broche, dras a detail, sel, blez, et autres riens choses par setiers ne par muis, et se il poest estre trouve autremant ycelles marchaandises charront en la forfeture de la ville de Roen, si conme il a esté usé, et de ycelle forfeture aura nostre sire le rei la metié et nous l’autre, et sera la devant dite forfeture jugiée par nous si conme il a esté usé et acoustumé, et demoureront les religions en autiel estat conme il sont orendreit, et les bourgeis de Paris demoureront autresi en autiel estat conme il sont orendreit envers nous, et nous envers eux, et quant les devant diz II anz seront aconpliz, se il a aucune chose a ajouster ou a remuer en cest escrit pour le preu le rei et pour le nostre, par son acort et par le nostre sera ajousté et remué ou osté en tieu maniere que, se il ne plet a nostre sire le rei et a nous que ceste ordenance seit a fin apres les devant diz II anz, nous rarons et rapeleron noz franchises en autiel point conme nous les avon orendreit sanz aucun enperemant ; et se il plesoit a nostre sire le rei et a nous que la dite ordenance fut a fin apres les devant diz II anz, le rei fera le port de Couronne oster et abatre de tout en tout, et ceste ordenance nous a il confermé de son seel, sauves a nous toutes nos autre franchises, par un autre escrit en tieu maniere que dedanz les II ans a sa volenté il puet la dite ordenance rapeler et cest escrit avonous confermé du seel de nostre mereté. Et fu fet en l’an de grace M et CC et LXVI.

Pour citer l'acte :

« Acte 3673 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_3673.html [consulté le 24/11/2024].

Création de la fiche

2008-07-25

Dernière mise à jour

2023-12, EMancel