Scripta n° 1897

Numéro Scripta	1897

Auteur(s)	Urbain III [pape]
Bénéficiaire(s)	Cherbourg, Notre-Dame du Vœu (abbaye)

Genre d'acte	bulle
Authenticité	non suspect
Datation	1187, 22 mai
Lieu d'émission	Vérone
Action juridique	confirmation
Langue du texte	latin

Analyse

Urbain III confirme les biens de l’abbaye Notre-Dame de Cherbourg.

Tableau de la tradition

Éditions principales

a. Piolin Paul, Sainte-Marthe Denis de, Gallia Christiana in provincias ecclesiasticas distributa, t. XI, Paris, Palmé, 1874, Instrumenta ecclesiae Constantiensis, n° XXV, col. 250-252..

Texte établi d’après a

Urbanus episcopus, servus servorum Dei, dilectis filiis abbati beatæ Mariæ de Cæsaris-burgo ejusque fratribus, tam præsentibus quam futuris, regularem vitam professis, in perpetuam memoriam. Monet nos apostolicæ sedis cui licet immeriti deservimus auctoritas, pro statu omnium ecclesiarum provida circumspectione satagere ; et ne malignorum rapinis vel molestiis exponantur, apostolicum ipsis patrocinium impertiri. Quapropter, dilecti in Domino filii, vestris postulationibus clementer annuimus, et præfatam ecclesiam sanctæ Mariæ de Cæsarisburgo, in qua divino estis obsequio mancipati, adinstar felicis recordationis Alexandri papæ prædecessoris nostri, sub beati Petri et nostra protectione suscipimus, et præsentis scripti privilegio annuimus. Inprimis siquidem statuimus, ut ordo canonicus qui secundum Deum et beati Augustini regulam atque institutionem fratrum sancti Victoris in eadem ecclesia institutus esse dinoscitur, perpetuis ibidem temporibus inviolabiliter observetur. Præterea quascumque possessiones, quæcumque bona eadem ecclesia in præsentiarum juste et canonice possidet, aut in futurum concessione pontificum, largitione regum vel principum, oblatione fidelium, seu aliis justis modis, præstante Domino, poterit adipisci, firma vobis vestrisque successoribus et illibata permaneant, in quibus hæc propriis duximus exprimenda vocabulis: Locum ipsum, scilicet insulam Ulmi, in qua præfata ecclesia sita est, cum omnibus pertinentiis suis ; Novam-villam cum omnibus pertinentiis suis . . . . . . terram magistri Joannis in Equeurdrevilla, tres partes molendini Ihioul in eadem villa . . . . . monasterium sancti Helerii de insula Gerseio, sicut dem monasterium et ecclesiæ vestræ a bonæ memoriæ Rotrodo Rotomagensi archiepiscopo est concessum, et tam suo quam venerabilis fratris nostri Gualterii successoris sui scripto authentico confirmatum assensu principis terræ in cujus eleemosyna . . . . . . . mansuram quam Robertus miles dedit vobis apud Cæsaris-burgum . . . . . . propriis manibus vel sumptibus colitis, sive de nutrimentis animalium vestrorum nullus a vobis decimas exigere vel extorquere præsumat : liceat quoque vobis clericos vel laïcos e seculo fugientes liberos et absolutos ad conversionem recipere, et eos absque contradictione aliqua retinere. Prohibemus insuper ne ullus fratrum vestrorum post factam in eodem loco professionem possit de eodem loco, sine licentia sui abbatis, discedere ; discedentem vero absque communium literarum cautione nullus audeat retinere. Cum autem generale interdictum terræ fuerit, liceat vobis, clausis januis, exclusis excommunicatis et interdictis, non pulsatis campanis, suppressa voce divina officia celebrare. In parochialibus autem ecclesiis quas habetis, liceat vobis sacerdotes eligere, et diœcesano episcopo præsentare, quibus si idonei sint, episcopus curam animarum committat, ut ei de spiritalibus, vobis vero de temporalibus debeant respondere. Inhibemus quoque ne in presbyteris præsentandis, aut ecclesiis ordinandis, quilibet vos absque manifesta et rationabili causa gravare aut molestare præsumat. Prohibemus insuper ne ecclesias aut terras, seu quodlibet beneficium ecclesiæ vestræ collatum liceat alicui personaliter dare, sive alio modo alienare, sine consensu totius capituli, aut majoris et sanioris partis ejusdem. Si quæ vero donationes vel alienationes aliter quam dictum est factæ fuerint, eas irritas esse censemus. Inhibemus etiam ne infra parochias ecclesiarum vestrarum aliquis ecclesiam vel oratorium sine diœcesani episcopi et vestro assensu ædificare præsumat, salvis tamen privilegiis Romanæ ecclesiæ. Interdicimus quoque ne aliquis in vos vel ecclesias vestras excommunicationis vel interdicti sententias sine manifesta et rationabili causa promulgare præsumat. Omnes præterea libertates et rationabiles consuetudines et immunitates, quas illustris rex Anglorum Henricus, et bonæ memoriæ Mathildis imperatrix mater ejus, advocatrix et fundatrix præfatæ ecclesiæ, aut eorum successores, vobis et ecclesiæ vestræ pia largitione donarunt, et scriptis suis authenticis firmaverunt, firmas et illibatas permanere sancimus. Præterea novas et indebitas exactiones ab archiepiscopis vel episcopis, archidiaconis seu decanis, aliisve omnibus ecclesiasticis personis omnino fieri prohibemus : pro chrismate vero, oleo sancto, consecrationibus ecclesiarum, sacramentis a vobis aut solo obtentu consuetudinis, aut quolibet alio modo, nemo quidquam audeat postulare. Sepulturam præterea ipsius loci liberam esse decernimus, ut eorum devotioni et extremæ voluntati qui se illic sepeliri deliberaverint, nisi forte excommunicati vel interdicti sint nullus obsistat, salva tamen justitia illarum ecclesiarum a quibus mortuorum corpora assumuntur. Obeunte vero te nunc ejusdem loci abbate, vel tuorum quolibet successorum, nullus ibi qualibet subreptionis astutia seu violentia præponatur, nisi quem fratres omnium consensu, vel fratrum pars consilii sanioris, secundum Dei timorem et beati Augustini regulam providerint eligendum. Decernimus ergo ut nulli omnino hominum liceat præfatam ecclesiam temere perturbare, aut ejus possessiones auferre, vel ablatas retinere, minuere, seu quibuslibet vexationibus fatigare, sed omnia integra conserventur, eorum pro quorum gubernatione ac sustentatione concessa sunt usibus omnimodis profutura, salva sedis apostolicæ auctoritate, et diœcesani episcopi canonica justitia. Si quæ igitur in futurum ecclesiastica secularisve persona hanc nostræ constitutionis paginam sciens contra eam venire temere tentaverit, secundo tertiove commonita, nisi reatum suum congrua satisfactione correxerit, potestatis honorisve sui careat dignitate, reamque se Domini judicio existere de perpetrata iniquitate cognoscat . . . . . Cunctis vero eidem loco sua jura servantibus, sit pax Domini nostri Jesu Christi, etc. . . . . Ego Urbanus catholicæ ecclesiæ episcopus. Ego Henricus Albiensis episcopus. Ego Theobaldus Hostiensis episcopus. Ego Petrus de Bonna presbyter cardinalis tituli sanctæ Susannæ. Ego Laborans presbyter cardinalis sanctæ Mariæ trans Tiberim, tituli Calixti. Ego Rainerius presbyter cardinalis sanctorum Johannis et Pauli, tituli Pammachii. Ego Hyacinthus sanctæ Mariæ in Cosmedin diaconus cardinalis. Ego Gratianus sanctorum Cosmæ et Damiani diaconus cardinalis. Ego Rollandus sanctæ Mariæ in Porticu diaconus cardinalis. Ego Petrus sancti Nicolai in Carcere Tulliano diaconus cardinalis. Ego Radulphus sancti Georgii ad Velum-aureum diaconus cardinalis. Datum Veronæ per manum Alberti sanctæ Romanæ ecclesiæ presbyteri cardinalis et cancellarii, XI cal. Junii, indictione V, Incarnationis Dominicæ anno M. CLXXXVII, pontificatus vero domini Urbani papæ tertii anno secundo, sub sigillo plumbeo.

Pour citer l'acte :

« Acte 1897 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_1897.html [consulté le 24/11/2024].

Création de la fiche

2007-04-02

Dernière mise à jour

2024-06-12, TFujimoto