Scripta n° 2392

Numéro Scripta	2392

Auteur(s)	Guillaume Enguaigne clerc, garde du sceau de la vicomté de Carentan [autre]
Bénéficiaire(s)	Le Désert, Sainte-Catherine de La Perrine (prieuré)

Genre d'acte	charte
Authenticité	non suspect
Datation	1294, janvier
Action juridique	notification
Langue du texte	ancien français

Analyse

Nicolas Le Bourguignon, prêtre, de Torcleville et Guillaume Le Bourguignon, son frère, vendent au prieuré de La Perrine deux portions de dîme à Montmartin-en-Graignes.

Tableau de la tradition

Éditions principales

a. Dubosc François, Cartulaire de la Manche, abbaye de la Luzerne, abbaye de Mont-Morel, prieuré de la Perrine, Saint-Lô, Jacqueline fils (Archives départementales de la Manche), 1878, Prieuré de La Perrine, n° XXXIV, p. 29-30..

Texte établi d’après a

A touz ceus qui ces letres verront et orront Guillame Enguaigne clerc, garde du seel de la visconté de Karenten, saluz. Sachiez que par devant moy furent presens Nichole dit le Borguegnon, prestre, gouvernoor de l’eglise de Torclevile, et Guillame dit Le Borguegnon, son frère, fiz Maheu Le Borguegnon, et recognuurent de lor bone volenté aver vendu àfin d’éritage au menistre et as freres de la meson de Sainte Katerine de la Perrine deus porcions de disme les queles les dis Nichole et Guillame freres aveent et porseeent par droit héritage en la parroesse de Mon Martin en Graiene, assises en la déle qui est appelée Bosc Flamenc, cest assavoer entre la quemune de Plein Maresc, dun costey, et le chemin qui devise les parroesses de Dae et de Mon Martin, de l’autre costey, et bute, d’un chief, as marès d’Isguate et, de l’autre, au doit de Maubec, por les queles deus dictes porcions de disme les dis religious ont douné as dis Nichole et Guillame, frères, quatrevinz livres de Torneis donc il se tindrent por paez par devant moy et pramistrent les dis Nichole et Guillame, freres, que eus et lor hers sunt tenus as dis religious et a lor successors les deus dictes porcions de disme vers touz guarantir, delivrer et defendre ou eschangier allors en lor propre héritage value à value soufisaument. Et à cen tenir et aemplir les dis Nichole et Guillame, freres, obligent eus et lor hers et tous lor biens meubles et non meubles présens et à venir, à vendre et à despendre par la justice por paer as dis religious ou à qui portera ces letres les cous et les despens que il aroent fez et evs por cen entériner et aemplir. Et à cen fut présente Aaliz, fame du dit Guillame, et vout et otria que ladicte vente fust ferme et estable eu tems à venir, sans jamès aler encontre, et jura sur sains, ovec l’auctorité dudit Guillame, que jamès encontre ceste vente des deus devant dictes portions de dimes n’ira ne ne riens ni demandera, par reson de doare ni en nulle autre manière. En tesmoig de cen cesto letre est seelée du seel de la visconté de Karenten oveques les seaus as devant dis Nichole, prestre, Guillame et Aaliz, sa fame. Ce fut fet en lan de grace mil et deus cens et quatrevinz et treze, eu mois de jenvier.

Pour citer l'acte :

« Acte 2392 », dans SCRIPTA. Base des actes normands médiévaux, dir. Pierre Bauduin, Caen, CRAHAM-MRSH, 2010-2024. En ligne : https://mrsh.unicaen.fr/scripta/doc/sc_2392.html [consulté le 21/11/2024].

Création de la fiche

2007-05-22

Dernière mise à jour

2023-12, EMancel